136 páx.

O Grupo Lúa Crecente formouse no ano 1997, cando a Consellaría de Sanidade tivo a iniciativa de ofrecer ao profesorado de Educación Secundaria unha guía para abordar os temas transversais desde unha perspectiva integral de educación das actitudes. Naquel momento, encargóuselle a Lola Ferreiro a coordinación do proceso de construción da dita guía, así como das accións necesarias para a súa implementación (adestramento do profesorado e supervisión da dinámica de funcionamento).
Esta iniciativa xa viña precedida dalgúns traballos previos en colaboración co PES (Promoção e Educação para a Saúde) do Ministério da Saúde de Portugal, en que unha serie de profesionais galegas levaran ao cabo un proceso de adestramento de técnicas e técnicos portugueses, tanto no continente coma nas illas Açores… e estes son os precedentes da formación do grupo… Un longo proceso de reflexión e debate ao redor de temas de saúde e de educación para a saúde, desde a perspectiva do xénero e para unha intervención sobre os elementos afectivo-emocionais que condicionan a construción da saúde…e tamén da desigualdade e da violencia.
Ao longo de todos estes anos fomos configurando un corpo teórico cada vez máis integral, coa súa dimensión de xénero máis inzada, que se pode enunciar, a moi grandes trazos, en que o proceso educativo debe contemplar a intervención no ámbito afectivo-emocional e sexual para contribuír a un proceso de maduración das persoas que leve aparellada a promoción da autoestima, da liberdade e da responsabilidade, como piares básicos da saúde e da igualdade entre os xéneros, á súa vez imprescindíbeis para a eliminación da violencia, e este proceso, para desenvolver en parte na escola, debe comezar nos primeiros niveis do ensino.
Este documento fornece os fundamentos teóricos para o antedito proceso de intervención, comezando pola panorámica da construción da personalidade e do xénero, das actitudes e dos sistemas motivacionais, para continuar despois coa explicación do modelo de
intervención integral e rematar ofrecendo unha serie de indicacións dos recursos máis importantes para o traballo: a dinámica de grupos e os campos simbólicos.