Metodoloxía Design Thinking para a inclusión sociolaboral de mulleres migrantes
Desde a Universidade de Vigo están traballando, no marco dun proxecto da UE, no deseño dunha web que inclúe procedementos e ferramentas baseados en metodoloxía creativa Design Thinking. A pretensión é ofrecer a educadores/as do eido social ferramentas e recursos para facilitar a inclusión sociolaboral de mulleres migrantes, que podería ser unha metodoloxía complementaria ao traballo que habitualmente se leva a cabo nestes contextos.
Antes de poñer en práctica as ferramentas incluídas nesta web, precisan a axuda para que o produto final sexa o máis efectivo posible. Por iso, pídennos difusión a profesionais que poidan revisar a información ofrecida na súa web e avaliación posterior a través dun breve cuestionario.
Na seguinte ligazón (https://thinklusion.webs.uvigo.es/) atópase a información da web organizada nos seguintes apartados:
Introdución (que achega a metodoloxía e obxectivos do proxecto)
Quen somos (información sobre o equipo de traballo e as institucións nas que imos probar a eficacia da proposta)
Design Thinking (explica o proceso sistematizado que caracteriza a metodoloxía)
Ferramentas (ofrécense diferentes recursos de utilidade para cada unha das fases que compoñen a metodoloxía)
Modelos (ofrécense 5 exemplos nos que se exemplifican o procedemento e ferramentas propostas).
Compartimos e convidamos a participar, para que esta ferramenta poida ter en conta o punto de vista das/dos profesionais da Educación Social.