Convocatoria SandBox Territorial Xurés 360
A organización de
Xurés 2026 abre unha convocatoria dirixida a iniciativas que queiran
presentarse no SandBox Territorial Xurés 360. O SandBox será un espazo
específico, dentro da variada programación do Xurés 2026, que pretende reunir á
comunidade académica, profesional e territorial arredor dos grandes retos do
rural, promovendo o diálogo entre universidade, administración, tecido social e
sector produtivo. Considérase de especial interese facilitar a participación de
organizacións, entidades e profesionais que queiran promocionar os seus
programas e iniciativas.
A presente
convocatoria pretende seleccionar proxectos e experiencias relevantes que
contribúan á dinamización comunitaria, social e económica do rural, co
obxectivo de visibilizar iniciativas innovadoras, sostibles e transferibles ao
territorio. Os proxectos seleccionados disporán dun espazo expositivo e terán a
posibilidade de difundir as súas propostas entre o numeroso público que acode
ao Xurés 2026, favorecendo o contacto directo con outros actores de interese e
dinamizando a configuración de redes. A actividade de exposición
celebrarase na tarde do 26 de setembro.
Terán prioridade aquelas iniciativas que...
· Poidan ser consideradas boas prácticas.
· Presenten impacto na dinamización comunitaria e social do rural.
· Incorporen enfoques de innovación social, participación, sostibilidade ou resiliencia territorial.
· Sexan experiencias replicables ou transferibles a outros contextos rurais.
Formato de participación
As iniciativas seleccionadas disporán de:
· Un espazo expositivo durante a tarde do 26 de setembro (stand de 3x3 m.)
· Apoio da organización para a súa visibilidade dentro do programa Xurés 2026.
Presentación
de candidaturas
As entidades e proxectos interesados deberán enviar unha breve descrición da iniciativa e os datos de contacto ao correo electrónico formacion@ceesg.gal.
O prazo de
presentación estará aberto ata o 15 de xuño.