Novas concentracións 9 de novembro: Ourense, Santiago, A Coruña
Tras ternos manifestado ante o Parlamento de Galicia, convócanse desta volta concentracións en diferentes localidades, co mesmo lema, para seguir chamando a atención sobre a necesidade de dignificar a situación da profesión de Educación Social na Xunta de Galicia.
Lugares:
Ourense. Diante da delegación da Xunta. Adva. La Habana, 79 (Casa de chocolate)
A Coruña. Diante do delegación da Xunta. R/ Vicente Ferrer, 2 (Edificio Monelos)
Santiago. Nos xardíns diante da Xunta. San Caetano, s/n.
Hora: 19:00 h.
Lema: Educación Social é a nosa profesión.
Que reclamamos?
Que se actualice a Lei 2/2015, de Emprego Público de Galicia, para que estableza como única titulación de acceso á especialidade “Educador/a Social” a o título universitario de Educación Social (Diplomatura ou Grao).
Actualmente admítense tamén as titulacións de Mestra/e ou grao de Educación Primaria, Licenciada/o en Pedagoxía, Psicoloxía ou Psicopedagoxía, ou primeiro ciclo da titulación de Psicoloxía ou Pedagoxía, ou graduada/o nunha titulación da rama de ciencias sociais e xurídicas ou da rama de ciencias da saúde equivalente a calquera das anteriores. Esta situación, herdada dos tempos nos que non existía a titulación universitaria de Educación Social (hai máis de 30 anos) hoxe en día é unha situación totalmente anómala e anacrónica.
É necesario adaptar as categorías profesionais á realidade académica. A persistencia desta situación supón un desprezo e menoscabo cara a profesión e cara as profesionais de Educación Social. Ademais, é tamén un factor que incide negativamente na calidade dos servizos socioeducativos e no dereito da cidadanía a recibir unha atención especializada. A titulación de Educación Social creouse porque había unha necesidade de especialización profesional que non tiña reflexo no ámbito académico; polo tanto non ten sentido que despois de implantados os estudos universitarios non se adapten as categorías profesionais.
A continuación facemos un breve repaso das accións mantidas este ano en relación á situación da especialidade “Educación Social” na Xunta de Galicia.
Febreiro de 2024. O Director Xeral de Función Pública comprométese -e fai constar por escrito- a iniciar trámites para a modificación da Lei de Emprego Público a través da Lei de medidas fiscais e administrativas que se tramita a finais de cada ano xunto cos Orzamentos da comunidade autónoma.
Abril 2024. Tras cambio na titularidade da Dirección Xeral, mantemos reunión coa nova Directora Xeral de Emprego Público para informar do asunto, facilitándolle documentación complementaria.
En diferentes datas durante os últimos meses, mantemos contacto tamén cos sindicatos CIG, CCOO e UXT, amosanto todos eles apoio ao cambio que solicitamos.
19 de outubro 2024. Publícase o Proxecto de Lei de medidas fiscais e administrativas, sen contemplar as modificacións acordadas.
22 de outubro 2024. Nova xuntanza coa Directora Xeral de Emprego Público, na que confirma que non ten intención de introducir as modificacións solicitadas.
Novembro 2024. Ante a falta de compromiso da Dirección Xeral, mantemos xuntanzas por separado cos Grupos Parlamentarios Popular, Socialista e BNG. Os grupos Socialista e BNG presentaron emendas ao proxecto de Lei de medidas fiscais e administrativas para modificar.
O pasado 18 de novembro tivo lugar o Pleno de debate á totalidade do proxecto de Lei de Orzamentos da Comunidade autónoma para 2025, á que vai ligada a Lei de medidas fiscais e administrativas. Agora continúa en trámite parlamentario, e queremos facernos ver e oir unha vez máis nas rúas, para poñer de manifesto a indignación que sentimos ante a falta de compromiso e ante unha irregularidade que se alonga durante demasiado tempo e que noutras comunidades autónomas xa se ten atallado dende hai anos.
Xa é hora de que a Educación Social teña o recoñecemento e respecto que merece. E de que a Xunta de Galicia cumpra co prometido.
Non faltes!
Recorda que a estas accións sumamos tamén as reclamacións individuais. Podes presentar en calquera rexistro da Xunta, dirixido á Presidencia, unha petición individual. Máis información aquí.
