Homenaxe ao profesor Xosé Manuel Cid

Desde o CEESG queremos compartir unha nova moi especial. O sábado 27 de setembro ás 17:00 h., terá lugar un acto de homenaxe ao profesor Xosé Manuel Cid Fernández, con motivo da súa xubilación, en recoñecemento á súa longa traxectoria e compromiso coa Educación social en Galicia, e como mostra do afecto e respecto profesado polo colectivo profesional. Este acto terá lugar no marco do Xurés 2025, que se celebrará do 26 ao 28 de setembro en Lobios.

Colexiado de honra do CEESG, Xosé Manuel Cid é unha figura clave no desenvolvemento da Educación social no noso país. Como decano da Facultade de Educación e Traballo Social da Universidade de Vigo, e ao longo dunha carreira marcada polo compromiso, deixa unha fonda pegada tanto no eido académico como no profesional. Membro fundador de Nova Escola Galega e promotor do Grupo de Educadores/as para a Paz, defendeu sempre unha educación transformadora, comprometida coa xustiza social, os dereitos humanos e a identidade galega.

Ao longo dos anos, apoiou activamente o noso colexio profesional, promovendo espazos de colaboración, reflexión e formación entre universidade, profesión e sociedade. A súa xenerosidade, rigor e visión crítica convérteno nun referente para xeracións de educadoras e educadores sociais.

Convidámosvos a acompañarnos neste acto de recoñecemento, para celebrar con el esta nova etapa vital, agradecerlle o camiño compartido e, con toda certeza, seguir compartindo moitos máis encontros e aprendizaxes.