Curso: Falemos de autismo desde o paradigma da neurodiversidade
A Asemblea Xeral do CEESG 2026 trae este ano unha actividade emparellada que suma valor á participación: unha formación específica sobre TEA, pensada para ofrecer ferramentas útiles e aplicables á práctica profesional.
A asistencia á Asemblea convértese así nunha oportunidade dobre: participar activamente na vida do Colexio e, ao mesmo tempo, ampliar coñecementos e recursos profesionais da man dunha educadora social especialista na materia.
O curso «Falemos de Autismo desde o paradigma da neurodiversidade» parte dun enfoque participativo e práctico, combinando exemplos reais, dinámicas interactivas e espazos de intercambio de experiencias que favorecen tanto a aprendizaxe como a creación de redes de apoio profesional.
Durante o curso abordaranse temas clave, como:
-
Comprensión do autismo desde a perspectiva da neurodiversidade e as características centrais do TEA.
-
Estratexias de apoio e intervención para facilitar a comunicación, interacción e autorregulación emocional das persoas autistas.
-
Prácticas inclusivas e convivencia educativa, co fin de promover contornos respectuosos e adaptados ás necesidades de cada persoa.
-
Recursos didácticos e materiais de apoio para o uso profesional.
A formación será impartida por Noemí Noya Barrio, educadora social colexiada e especialista en neurodiversidade, con ampla experiencia en acompañamento e recursos educativos para o autismo.
A formación consta dunha sesión presencial (2h) o propio día da asamblea en horario de 16h a 18h e unha segunda xornada en liña (2h) o martes 17 de marzo na aula virtual do Ceesg, tamén en horario de 16h a 18h.
Desde o CEESG apostamos por asembleas vivas, que vaian máis alá do encontro formal e se convertan tamén en espazos de aprendizaxe, encontro e coidado profesional. Este 2026, participar na Asemblea é tamén investir na túa formación. Pronto recibirás a convocatoria oficial coa orde do día. E, como outros anos, a Asemblea non acolle unha soa proposta: haberá máis contidos e espazos pensados para este encontro, que iremos compartindo pouco a pouco.
Reserva a data. Haberá razóns de sobra para estar!
INSCRICIÓN GRATUÍTA, EXCLUSIVA PARA COLEXIADAS/OS E PRECOLEXIADAS/OS QUE ASISTAN Á ASEMBLEA DO CEESG.
